ڕاگەیاندنی ڕێکخستنە نهێنییەکانی کۆمەڵە (زاگرۆس) سەبارەت بە؛ ڕێ و ڕەسمی ڕێز لێنان لە شەهیدانی ٣ی خەرمانان لە مەریوان

کۆمەڵانی خەڵکی کوردستان

ژینگە پارێزان

چالاکانی مەدەنی

ژینگەو ژینگە پارێزی وەک ئەسڵێک بۆ مانەوەی ژیان و درێژەدان بە هەوڵەکان لە پێناو زیندو راگرتنی ژینگە بۆ ژیانی باشتر هەمیشە خولیایەک بووە کە لە مێژە مرۆڤە بەرپرسەکان و گوفتمانە بەڕۆژەکانی سەردەم هەمیشە گرینگی و بایەخیان پێداوەو لە پێناوی ژینگەیەکی خاوێن و شیاوی ئینسان بۆی تێکۆشاوون.

کلتووری ژینگەپارێزی و پاراستنی ژینگە بە درێژایی ٤٠ ساڵ حاکمییەتی  ڕەشی کۆماری ئیسلامی رژیم یەکێک لەو بوارانە بووە کە بزووتنەوەی شۆڕشگێڕانەی کوردستان بە چاوی پڕبایەخەوە سەیری کردووە.

کەمتەرخەمییەکانی دەسەڵات و تەنانەت هەوڵە دوژمنکارانەکانی رژیم لە پێناو فەوتاندن و لەناوبردنی ژینگەی کوردستان بۆ هەموو خەڵک و ژینگەپارێزان ئاشکرایەو ئەو کەمکارییانەی لە لایەن ئێمەو هەموو کۆمەڵانی خەڵکی کوردستان مەحکومەو ئاوڕێان لە پاراستنی ژینگە نەداوەتەوە ، بەڵکو سیستم و دەست و پێوەندەکانی رژیم خۆیان هۆکاری تێکدان و سوتاندن و لەناوبردنی ژینگە بوون.

رۆژی ٣ی خەرمانانی ساڵی رابردو کە ژینگە پارێزان شەریف باجوەر و ئومید کۆنەپۆشی لەکاتی کوژاندنەوەی ئاگری دارستانەکانی مەریوان گیانیان بەختکرد بووە هۆکاری پەرۆشی و دڵنیگەرانی کۆمەڵانی خەڵکی کوردستان.

گیان لەدەست دانی ئەوان خەسارێکی گەورە بوو کە لە کۆمەڵگای مەدەنی کوردستان بەتایبەت شاری مەریوان کەوت کە پڕکردنەوەی جێگای خاڵیان ئەستەم و کاتبەرەو دەبێت هەمووان لە پێناودرێژەدان بە رێگایان کە پاراستنی ژینگەی کوردستانە تێبکۆشین.

دوێنی ٣ی خەرمانان کە هاوکات بوو لەگەڵ یەکەمین ساڵوەگەڕی گیانبەختکردنی شەریف باجوەر و ئۆمید کۆنەپۆشی بە گرتنی رێوڕەسمی بەشکۆو خوێندنەوەی سروودی شۆڕشگێڕانەو پێشکەشکردنی وتاری بەنرخ و بەشداری هەزاران کەسی لە کۆمەڵانی خەڵکی کوردستان لەو رێوڕەسمەدا هەم جێگای دەست خۆشی و هەم رێزلێنانێکی شیاوی ئەو دو مرۆڤە تێکۆشەرە بوو کە ژیانی خۆیان پێشکەش بە پاراستنی ژینگە کردووە.

رۆژی ٣ی خەرمانان بۆ کۆمەڵانی خەڵکی کوردستان و بەتایبەت بۆ شارۆمەندانی مەریوان دوپاتبوونەوەی مێژووە کەلەم رۆژە دا ٩ کەس لە تێکۆشەرانی لەلایەن خەڵخاڵیەوە ئێعدام کران و هاوکاتیش لە ٣ی خەرمانانی ساڵی رابردو هاوڕێیان ئەرسەلان جەوزاک، پەرویز عەبدی و ناسر نساج بەدەستی رژیم گیانیان بەختکرد.

لێرەدا یادی خۆشەویست و ئازیزی هەموو ئەو تێکۆشەرانە بەرزرادەگرین و سپاسی رێکخەران و هەموو خەڵکی مەریوان ئەو کەسانەیش دەکەین کە بە هەست بە بەرپرسایەتیەوە بەشداریان لەو رێوڕەسمە بەشکۆیەدا کردبوو.

بۆ پێشەوە بەرەو کۆمەڵگایەکی ژینگە دۆست و ژینگە پارێز.

 

 

تەشکیلاتی زاگرۆس

کۆمەڵەی شۆڕشگێڕی زەحمەتکێشانی کوردستانی ئێران

٤ی خەرمانانی ١٣٩٨ی هەتاوی

 

 

 


ئه‌م بابه‌ته 423 جار خوێنراوه‌ته‌وه‌‌

AM:11:40:26/08/2019